荷蘭喺世盃前傳出噩耗，右閘祖利安添巴因為傷患未愈，將會退出世盃大軍。荷蘭周二(9日)同烏茲別克踢熱身賽，只靠兩個12碼驚險絕殺，而且仲有門將華布根傷出，令人失望。
效力阿仙奴嘅添巴近月一直受傷，雖然趕得切喺歐聯決賽上陣，而且更為荷蘭拍世盃造型照，但足總周二宣布：「添巴嘅鼠蹊傷患未康復，同醫療團隊商議後，決定佢要離開大軍。」荷蘭領隊朗奴高文已補選基爾圖特亞代替。
荷蘭對烏茲別克一戰，上半場由加普射入12碼領先，但古斯迪爾87分鐘食紅牌，烏茲別克就喺補時2分鐘追平。以為荷蘭贏唔到波，去到補時8分鐘竟再獲12碼，加普操刀射入，助荷蘭贏2比1。荷蘭正選門將華布根喺下半場傷出，目前未知傷勢嚴重程度。
閃擊世盃2026，有齊球星資料，砌出你心目中最佳11人：